Дзень роднай мовы

Дата: 22 февраля 2022 в 11:00

Автор: Пискунович Д. А.

177 просмотров

Дзень роднай мовы

Cёння ў свеце шмат цудоўных моў. Адны з іх вабяць сваёй прыгажосцю і непаўторнасцю, другія – мілагучнасцю. Але ў кожнага чалавека ёсць толькі адна мова, якая завецца роднай. Менавіта на гэтай мове ён размаўляе з роднымі, сябрамі, знаёмымі. І вельмі дрэнна, калі чалавек пачынае забывацца на сваю мову, не шануе яе.

Штогод у нашай школе адзначаецца Міжнародны дзень роднай мовы. І гэты год не стаў выключэннем. У фае школы аформлены стэнды, мэта якіх паказаць, што беларуская мова не толькі жыве, але і натхняе на творчыя ініцыятывы. Дзень роднай мовы пачаўся з любімай вучнямі акцыі “Беларускі верш - за цукерку”. 2022 год у Беларусі праходзіць пад знакам падвойнага літаратурнага юбілею - 140-годдзя Янкі Купалы і Якуба Коласа. Таму ў выкананні вучняў гучалі вершы менавіта гэтых вялікіх беларускіх паэтаў.

Спалучаем смачнае з карысным і атрымліваем двайную асалоду: веды пра самабытныя моўныя выразы і прыемныя эмоцыі! Наступным мерапрыемствам стаў аукцыён ”Растлумач фразеалагізм-атрымай цукерку”. Неабходна было растлумачыць значэнне прапанаваных устойлівых выразаў, а таксама падабраць адпаведны фразеалагізм на рускай мове.

Цікавай і карыснай стала лексічная гульня ”Перакладчыкі”, дзе вучням трэба было перакласці словы з рускай мовы на беларускую.

Вельмі напружаным і цікавым атрымаўся конкурс “Расшыфруй прыказку”. Каб разгадаць зашыфраванае выказванне, трэба суаднесці лічбу і літару алфавіта, а для гэтага трэба добра ведаць беларускі алфавіт.

Усе ўдзельнікі атрымалі асалоду ад атмасферы, якая панавала ў час мерапрыемстваў. Бо выконвалі вучні заданні яшчэ і пад музыку такіх беларускіх песень, як “Полька беларуская”, “Цячэ вада ў ярок”, “Ох і сеяла Ульяніца лянок” і іншых.

Дзень роднай мовы прайшоў цікава і плённа. Кожны ўдзельнік мерапрыемства пераканаўся, якая багатая і чароўная наша родная беларуская мова. Яна вучыць нас любіць сваю Радзіму, з павагай адносіцца адзін да аднаго.